போரை நிறுத்த செம ஐடியா! - இந்தியாவை பாராட்டிய உக்ரைன்!

ரஷ்யா-உக்ரைன் போருக்கு முடிவு காண இந்தியா முன்வைத்துள்ள போர் நிறுத்த முன்மொழிவை, இதுவரை கிடைத்துள்ள 4 திட்டங்களில் மிகவும் விரிவானது என உக்ரைன் பாராட்டியுள்ளது. இதன் மூலம் அமைதிப் பேச்சுவார்த்தையில் இந்தியாவின் பங்கு மேலும் முக்கியத்துவம் பெற்றுள்ளது.

உக்ரைன் வெளியுறவுத் துறை அமைச்சர் ஆண்ட்ரி சிபிஹா இதுகுறித்து கூறுகையில், இந்தியா, துருக்கி, எகிப்து, அமெரிக்கா ஆகிய நாடுகளிடம் இருந்து போர் நிறுத்தம் தொடர்பான 4 முன்மொழிவுகள் கிடைத்துள்ளதாகத் தெரிவித்தார். அவற்றில் இந்தியாவின் திட்டமே மிகவும் விரிவானது என்றும் அவர் குறிப்பிட்டார்.

எரிசக்தி கட்டமைப்புகள் மற்றும் துறைமுகங்கள் மீதான தாக்குதல்களையும் நிறுத்த வேண்டும் என்று உக்ரைன் வலியுறுத்தியுள்ளது. கருங்கடலில் தானிய ஏற்றுமதியை மீண்டும் சீர்படுத்துவதற்கான போர் நிறுத்தத்தை துருக்கியும், எகிப்தும் முன்மொழிந்துள்ளன. உக்ரைனின் தானிய ஏற்றுமதியைச் சார்ந்துள்ள நாடுகளுக்கு இது முக்கியமானதாகக் கருதப்படுகிறது. அமெரிக்கா எரிசக்தித் துறையில் போர் நிறுத்தத்துக்கான தனி முன்மொழிவை வழங்கியுள்ளது.

எரிசக்தித் துறை மற்றும் கருங்கடல் பகுதியில் ஒருங்கிணைந்த போர் நிறுத்தத்தைப் பரிசீலிக்க உக்ரைன் தயாராக இருப்பதாக சிபிஹா தெரிவித்துள்ளார். மேலும், முன்களப் பகுதிகளில் நிபந்தனையற்ற போர் நிறுத்தம் மேற்கொள்வது குறித்தும் உக்ரைன் பரிசீலித்து வருவதாக அவர் கூறினார்.
ரஷ்ய அதிபர் விளாடிமிர் புதினும், உக்ரைன் போரை முடிவுக்குக் கொண்டுவர பிரதமர் நரேந்திர மோடி தொடர்ந்து முயற்சி செய்து வருவதாகவும், இதுதொடர்பாக மோடியிடம் நல்ல யோசனைகள் இருப்பதாகவும் சமீபத்தில் பாராட்டியிருந்தார். இது இந்தியாவின் சமரச முயற்சிக்கு கூடுதல் முக்கியத்துவம் அளித்துள்ளது.
ரஷ்யாவுடனும் உக்ரைனுடனும் நல்லுறவைப் பேணி வரும் இந்தியா, போரை முடிவுக்குக் கொண்டுவர பேச்சுவார்த்தை மற்றும் தூதரக முயற்சியே சிறந்த வழி என தொடர்ந்து வலியுறுத்தி வருகிறது. இந்த நிலையில், இந்தியாவின் விரிவான போர் நிறுத்தத் திட்டத்தை உக்ரைன் வரவேற்றிருப்பது அமைதி முயற்சியில் புதிய முன்னேற்றமாகப் பார்க்கப்படுகிறது.